Tekila Moments

SIGURO NAMAN ngayon, masaya na ako. Kasi kahit nakausap na siya, hindi na ako nasasaktan.

Pero kapag ikaw na ang hindi kumausap sakin, parang guguho ang mundo ko. Iba na ang ihip ng hangin.

Plinano ko talagang tawagan ka kagabi. Naisip ko langi na masaya siguro kung magsabi ako ng 'god bless' or 'ingatz' bago ka man lang sana umuwi ng probinsya ninyo. Gusto ko lang kumustahin ka kahit nakaka-text naman kita ng halus araw-araw. Wala lang. Ganun naman talaga, diba? ang nangyari nga lang, hindi ko agarang nagawa ang plano ko dahil ako man ay nasa biyahe rin. Hindi naman lingid sa kaalaman mo na magnet ako ng mga mandurukot at manyoyopi ng lansangan kaya ayokong magtatawag habang naglalakad. Nakailang wallet at cellphone na rin kasi ako kaya mabuti nang magtanda ako at ingatan ang gamit ko (lalo na kung wala pa akong pambili ng kapalit kung sakali man. Knock on the wood.)

Habang naiipit kami sa Sumatra road, hindi ko na namalayang hawak ko na pala ang cellphone ko at wala sa loob na pinipindot ang down pad ng navigator para sa mga numero. Tatawagan ba kita o hindi? Kailangan pa ba talaga kitang tawagan kung halus araw-araw naman kitang ka-text? Pero sa wakas, pinindot ko ang '4' ng dalawang beses at lumitaw ang pangalan mo sa pinakaibabaw. Tinangka kong kumonekta kaya lang, biglang dumilim ang screen ng cellphone ko. Empty na pala. Linsyak. Balewala ang pagmumuni-muni.

Pasado alas onse y media ng gabi na ako nakarating ng bahay at nuon pa lang ako nakahanap ng charger para sa cellphone ko. Pasado alas-dose na ng balikan ko ang cellphone para tumawag. Pero teka, naisip ko. Hindi na yata tamang magtatawag pa ako kung umaga na pala. Lalo na kung ang sasabihin ko lang naman ay 'ingatz'. Kaya, ipinasya kong mag-text na lang.
"Naalala ko lang, pauwi ka ng Tacloban. Ingat at magandang umaga. Mishu."

Hahaha... Maniniwala ka ba,  na nagulat ako sa mahinang tunog ng cellphone ko. Nang tingnan ko at basahin ang mensahe, tumatak ng husto sakin yung huling salita: "mishutu"

Bah. Hindi ka na asar sa akin kung ganun. Ayuz. Masarap na tulog ito.

That Which Produces Suffering

YOGURT ang paborito kong indulgence sa ngayon tuwing umaga. Hindi ko na maalala kung kelan yung eksaktong panahon na nag-umpisa ang pagyo-yogurt overload ko pero natatandaan kong iminungkahi ito sa'kin dahil nga nga sa imbalance diet ko raw. Yogurt at banana. Yogurt at wheat bread. Yogurt at peanut butter sandwich. Yogurt at tuna sandwich. Yogurt at kape. So ayun na nga, parang gusto kong punuin ng 'good' bacteria at kung anik-anik na microorganism ang bituka ko para luminis ang digestive echozers ko (sorry, hindi ako masyadong nag-research kaya ganyan na lang muna ang alternative terminology. Ketchup po ba?) Nag-wonder nga ako kung kapamilya ng Lacto bacilli Shirota strain yung kiyeme sa yogurt. Hindi kaya? Hmmm... posible.

May nabasa ako tungkol sa Pathogens. Sa description ng mga henyo at pantas ng medisina, ang pathogens ang mikrobyo (o bakterya? Pareho lang ba yun? Ewan ko. Dra. Red tulungan mo naman akong sagutin ito. Ü) nagdudulot ng sakit sa tao na nasasagap niya sa paligid niya.

"The term is most often used for agents that disrupt the normal physiology of a multicellular animal or plant. However, pathogens can infect unicellular organisms from all of the biological kingdoms." Anak ng... ano raw?!? *kamut-ulo* Ah basta, sa salitang Griyego, ang ibig niyang sabihin eh "that which produces suffering." Kumbaga, nagdudulot ng sakit, parusa, epidemya, sumpa, at kung anu-ano pa, basta anything that's bad for your health, malamang pathogen yun.

Naisip ko tuloy... naging pathogen din kaya ako sa iba? Yung ako yung nagdudulot ng sakit, parusa, epidemya, sumpa at kung anu-ano pa? Wala namang taong ligtas sa mikrobyo kahit na tumira siguro siya sa PAMET laboratory. Kaya malamang, isang bakterya ako na nagkatawang tao at naging sakit ng kalooban ng ibang tao, parusa, epidemya, sumpang hindi matanggal-tanggal ng albularyo at kung anu-ano pa. At naisip ko rin... ikaw kaya, anong klaseng mikrobyo? Malamang, isa kang uri ng Streptococcus na hindi pa matukoy ang genus. Ikaw yung mikrobyong nakakalat sa hangin na nagpapahirap sa paghinga ko. Bawat hininga kong laman ka, sakit ito ng kalooban at gunam-gunam. Kung ibabawal naman nila ang mikrobyong katulad mo, parang wala na ring silbing huminga pa. Kasi kahit virus ka sa buhay ko, mahal kita.